حْرُوفْ
حْروفْ دَاخلة بْ خيط بْيضْْ بيني وْبين لكتبَة
حْرُوفْ لحْيَاةْ
ح:الحَا
حْبْ وْرحَى
مْن نشوْة لمداد سْحَا
مَاتلا يهزو نـقْـطْ لقوَافي
وَلا تقد,وقارُو,فرحَة.
ي:اليَا
عــيَا
منْ تخيَاط السّطورْ
ا: الليفْ
حْرف وْليفْ
يْسرّبْ خيُوط اللغَا
ويْعاوْد التوليفْ
ة:التَا
شتَا
حْبلْ بيهَا لغمَامْ
عْلى تيلادُو وكـّـلهَا
جَابْ ليهَا التمَامْ
جَاتْ تشكلُو...شكـّـلهَا.
حْرُوفْ لبْلادْ:
عْدريني
مَابْقيتْ نفرقْ بينْ ليفكْ
وْبينْ زْروَاطْ لمْخزنْ
حْرُوفْ الــزّينْ
مَا تدُومْ حَالَة
...الزمان يرمي بْ صْـرُوفُو
الجْديد يتبالَى
يْدبَال الزّيـن، وتتيتّمْ حْــرُوفُو
سَارْحْ لكْلامْ:
بَانْ عيبُو، مَا عْـوّلْ يرُوفْ
كثير لوجُوه،لابد يْتلامْ
يشْـربْ منْ دْم لْـــــحْرُوفْ
وْيبْكي مْعَ سَارْحْ لكْـلامْ
طيفْ المْعْـنَى:
آجي يَاوا نسْكمُو لحْرُوفْ
رَا طيفْ المْعنى، بْدَا يْعوَاجْ
لكلامْ الحَاتلْ فْ لهَاة الغـيمْ
فْ كـفُـوفْ الرّمْلة،
تكْـتـْـــــبُو لمْــــــــــــــــوَاجْ.