ڭري يا حروف نسا
ڭري يا حروف نسا ڭري بلي كاين
عليك لامان وستا وستين امان
ڭري راه لمخبي بان
ربطة زغبية كوات لقلب كيه
امحياني ...ااڭلبي ..لقلم مد راسو لدوايه
يحكي حكاية من غرايب زمان
هزت رياح غرام لمكان
نون نسا ما جابت خبار
ولا ماليف ما بان ليه اثار
لا سعد تسڭد ولا بياضت يامو
ولا لڭعده زهات في رسامو
لخاطر مضيوم يتڭلب في نار لمحنه
على لخد دمعه ما كفات
امڭواني امي
لالة زينه وزادها نورلكلام
ايه ڭري يا حروف جدبه
ما ڭدني زهو لحرف ولوان
نزيد عشق لقلب باللوبان
لهم في لخاطر يتقلب بحال تيلاد
يتقامزفي شون لسرار
امحايني مسبيه مجدوبه لغيوان
من ذاك لجافي الدويرا في ظل نهار
رڭب رڭب هذ ليله
نغزلو من شنايف لقمره حلاوة لكلام
رڭب رڭب ازايرسبعتو رجال
راه خيبه ليام بقات مجليه وحيده
لله غير شوفه تبرد اجوف
اجيني واجيني على عودك راكب
عزم على عويشه تخوي لمكان
قالو ما يڭرڭر لحمام
غيرفي الرسام لمهجوره
جريت وجاريت بحور لعشق ملقيت دوا
تهديت انا يا زاير لهادي بن عيسى
اميمتي قالو زمان لي تلف يشد لارض
وانا شديت لقلم محير في سمق لغرام
كتبت حروفي مسربله في شلا معاني
نسقيها من بير بلا ڭاع
ڭري احروف النسا وحكي
مالكي دايخه
راه لقب بغا لا تزيدي هدره
و لبكا ورا لميت دساره
بعدما تكفن في قبرو خساره
ما يبات في لقبر غير لي ساكنو
احروفي ماقتلتيني ما حييتني ....
عفاك لا تخليني منسيه
بين لقوافي سايحه بوهاليه
نتحيرمع صحاب لحال
طالبة التسليم اسيادي تسليم
