حْمَلْ غْرِيبْ
حَمْلْ غْريبْ
مْسَوْلَفْ رْمُوشْ اللِّيلْ
دَاگْ اوتادْ
التَّخْمَامْ
فالرَّاسْ..
وَعْيُوطْ البَلْيَة مْسَاوْيَة
دقة عْلَى دقة
ْتبَرَّدْ سَاكنْ الحَضْرَة
فَشْعَابْ الدَّاتْ
َحطَّة خَالْيَة
وشُوكْ السَّدْرَة ... يدَفِّي لَوْهَامْ
بْلا ميعاد ...
وريقْ الجُوف ... نْدَى مزْرُوب
يسيلْ على فْرَاشِي ... هْبِيلْ
تْوَحش رِيحْتُ
تْوحَشْ مْنَامُ ... بُوغَطَّاطْ
وريق الجوفْ
... بِالخوفْ
دَارْ سَرَّابَة
خْيُوطْ مْكَتّْفَة تَّخْمَامْ
هَازَّة ضَوْ لَجْوَادْ ...
طْلَق سْرَاحي
إلى كُنْتِ بوهَالِي
الى كُنْتِ غِيوَانِي
شَمَّ بْخوري مَنْ رْمادْ مَكْتُوبِي
كَانْ عَافِيَة
جْمَرْ گادِي
فْدَاتِي دَرَّاتُ الرِّيحْ ... رْمَادْ
عَرِّيني نْدُوبْ
فَعْرَگ المَحْنَة
نْسَلَّمْ على شْوَارْبِي
بضحكة
نْدُقْ بِيبَانْ دْوَاخْلِي
بْتَنْهِيدَة
فَرَّادِية
والمحال ضاعْ
فشلا تَخْمَـامْ
فْشَلاَّ طُرْقانْ ... بْلاَ گَوَّادْ
سْكَاتْ الظلمة خَوَّافْ
حَمَّرْ عَيْنُ فِيَ
سْكَنْ مَوَّالي
وسَارْ يگُولْ كْلاَمْ كْلاَمي
فَيَّقْ سْكَاتِي
جْرَافْ الضِّيق
دْوَالي مَنْ لهْمُومْ
دَلاَّتْ حْمَاقْهَا .. نْكَادْ
دَرَّگْنِي مَنْ شُومْ غَدََّّ
مَن صَهْدْ حِيرَانْ ... مَجْلِي فَرْكَابُ
خايفْ الى يعْطَشْ خْيَالِي
وبَالِي يَنْتَفْ شَعْرة
مَنْ جْنَانْ لَعْقََََََلْ
التَّايهْ
المَضْيُومْ
فِْغُرْبةْ دَاكْ لَحْمَلْ الغْرِيبْ
وَحُرْگَةْ لَعْبَادْ ...
حَمَّالْ أَيَا حَمَّالْ
هَزْ حْمَلْ البَالْ
وعَكَّزْ
باشْ تَفْرْزْ
دمي من لحمي
والجَّلْدَة صْبرْ
گْلِيبْ التَّخْمَامْ فَدْفَادْ ...
دِّينِي نََسْگي حْرُوفِي ... سْبُوبْ
ونْكَمَّدْ مَكْتُوبِي فتوبْ ... مكتوبْ
نْعَزِّي نفسي فالبارح
وللي فات جارح
... سارح
فالدات ... دَمْ فلونْ لمداد ...
حْلاَلْ عْليكْ
تبكي
وتْگُولْ هَادِ ظُرُوفْ
حْرامْ عليك تشكي
وتْخَلي .... گلْبَكْ عَامَرْ بَالخُوفْ
الدنيا ما تَسْتَاهَلْ هَادْ لَعْدَابْ
وربي كبيرْ
راهْ عالمْ ويشوفْ
الهَمْ عَشْرَة
بِينْ النَّاسْ خَاوَة
الجُرح حَقْ
فالدنيا
يَتْشَافى ويْداوَة
وسْلام لحبيبْ
داكْ لحبيبْ لغريبْ
فَسْلاَمُ شُوفَة
حُبُّ ماشي عْداوة ...
سَال العين
واشْ خلاَّهَا بالدَّمعة حْزينة
سالْ الگلْبْ
وَاشْ خَلاهْ بالتنهيدة غْبينَة
المَكْتُوبْ .. حَطَّابْ
شُوكْ وحطبْ
عْوَافِيه دَّفِينَا
لُومْ الزمانْ
للي دَارْ
راهْ حْنا فِيهْ سَاوَا .
