الحال
ظلم دواخلك يا المعطي
خلي لحروف
تعلمك سر القمره
يطلع كلامك
مساوي
من صمت الظلمة
راوي
تشعل سكاتك جمرة
وانت داوي
تعطي لذاك
الليل ما عطاك من حسرة
طير ... سير
... اسرح
اعطي لمايتك جناوح فكرة
* * *
تسرب خيط
لحلام
كسات
الضحكة فم الشاهد
الشوفة منشار
و الضحكة مبارد
مديتِ قلبك
وصالي
واش يوصل
مطارحك للجمر
و شوفتهم يا المعطي تقهر
الزمان قالوا
تبدل
وحالك وحال اللي
بحالك
سمر اقدامه ف
العكبة
ما اطلع … ما
ارجع
ما هز .. ما
خفّف من حمالك
واش تعطي يا
لمعطي
قلت تمد قلبك
سواقي
تعطي باليمنيه
كبة
وباليسريه
سربة
تحل صدرك منجوج
و ميات سبة و سبة
تجيك ف صفة
تراب تسقيها
تجيك جريحة نايحه تدفيها
تبات على
بابها تحضيها
تغزلها بخيط
لمحبة
والكارحة ذيك
الجهة
الناكرة خير
بحالك
تفسخ جلدك
محبة
و هي تنصب
لك نشبة
واش تعطي يا
المعطي
تمشكوا لقدام ف
طريقك لها
جهة تجيها ف
السروية
بعرقك تنقش يديها
الحنة من
محنتك عليها
السواك من هواك
و فرحتك بها
لكحل من
تهواسك
وخوفك عليها
وذيك الجهة يا
المعطي
ما بغات تعطي
لها
بعتلة لمحبة
كربلت ترابها
نقيت الشوك من
جنابها
سلاحك كلمة
جوع
و طوع
و مد للشمس
قلبها تدفيه
الجرح ف صدرك
لا تعريه
كن مغزل
لصوفها
كن مريود
لكحلها
كن ف صباحك و
مساك سواك لها
و اعطيها يا
المعطي
و لا تنسى ما
تعطيها
جيها يا
المعطي من جهة كل الجهات
جيها م الفوق
غيمة نخوى
اسقي ترابها
جيها م التحت
زربيه عليها
تخطوي
جيها من جهة
ليمين
عكاز ف ساعة
الضعف قويها
كن نسيم
صباحها
و اعطيها يا
المعطي
و لا تنسى ما تعطيها
لله يا ذاك
العاطي
شحال من معطي
عاطي
يعطي و راسه
مطاطي
و الكارحة ذيك
الجهة
سدت عل لمعاطي
ماية باب و باب
و قالت :
آجيوا نتحاسبوا
على ذيك
لقصيدة الكافرة
اللي سقات
اولادي تخمام
عل الشوفة
المعيوفة
اللي خاصمت الضو مع الظلام
عل الكلمة
المكشوفه
اللي رسمت
حروفها معاكسة السعد
عل الحلمة
المسكوفه
اللي طلعت عناد
معنَّد
لله يا ذاك
العاطي
شحال من معطي
عاطي
يعطي و راسه
مطاطي
وانت يا
الكارحة
السارحة ف دمي جراح
بنيت لك قصر
وحفرتِ لي
قبر
مديت لك
حبل مفتول
و مديت لي
شريط منسول
انا المعطي
نعطي
و انت المعطي
تعطي
و العيطة عليك
لالة حطي
حطيني لسان
نخرج من كماطك
حطيني فكة
نخرج من رباطك
حطيني نحبو فيك
نعلم لساني سر
المشية
يوقف و يطيح
يوصل للحرف
حطيني كيف تشهات النظرة
نبكي معنق اقدامي
عل الخطوة اللي
ف دروبك ما تسكمات
حطيني نعطي
اوصافك في
حطيني نخطط
كلامك علي
حطي المعطي
يعطي له ماشي لي
انت لالة جهة
وبحالك جيهات
ها الغربي
برياحه
ها الشركي
بحره
و نا المعطي
بجراحه
أنا المعطي
بضره
و يا العاطي
زين لعطية
فك رباط
لمعاطي
ف كماط هذه
الجهة ريوسهم مطاطي
تمنيت حديد
كماطك يرشى
يتحتحت بسمة وخير
نعيشوا و
نتعايشوا
و تجيني يا جيهتي
ف صورة كبدتي
و نجيك يا
جيهتي
ف صورة المعطي
نعطي
ونعطي
ونزيد نعطي
حتى نقول و تقولي :
اعطينا و
تعاطينا ....
و ياك العاطي
الله