بغيت نغطس جمرة داتي
ف بحور النسيان
نطفي جمرة كياني
نمسح التخمام
من الحسبان
بغيت نخرج من راسي
نطلع من شهوة لمكان
حيرني خاطري
لاحني ف موج التسوال
تلعتم لساني و حار
بين الحا ل و المحال
حيرني تسوالي
يهبش فيا
و ف خيالي
كيفاش انت؟
علاش هو؟
انت ضو
هو ظلام
واش ضوك من خيالك؟
ولا ظلام خيالك من ضوك؟
حيرني خاطري
و لا حني ف موج التسوال
يهبش فيا
و ف حالي
واش انت لي كتبت لقصيدة؟
ولا لقصيدة لي كتباك؟
واش انت لي واخد لحروف من لكلام؟
ولا لحروف واخده كلامك؟
سؤال يهزني
سؤال يخبطني
ما عرف راسي فين نكون
واش ضو ف داتي؟
ولا خيال مظلام
واش قصيدة مكتوبة بكانتي؟
ولا قصيدة نصلاني كلام
عاري عليك يا خاطري
هدا انا
ف داتي
و داني فيك كبة من تخمام
فين انا ؟
فين راسي ؟
فين جواب السؤال؟
حيرتني يا الساكن دواخلي
قولي عفاك
فين انا كاين؟
ف داتي
ولا ف خيالي با ين
