لبطانة:
إلى العزيز، الرائع حدَّ الاذهال صديقي وأخي عزيز محمد بنسعد
آغمامة فايضة
فين كنتي نايضة؟
٭٭٭٭٭
خانتك السجية،عافتك لنظامْ
إيزار الباطل فرّْشتيه هدِيَّة
نوضتي حروفك تگدد لعظامْ
زيدتي لقصيدة تخلص الدِّيَّة
٭٭٭٭٭
ومال لقصيدة مقلقة؟
الحاجب ب الحاجب ملاقِي
ومال حروفها مقرقة
ومال السّْطور تقاقِي؟
آغمامة فايضة
فين كنتي نايضة
٭٭٭٭٭
جني وجنوني
ف عشقي ف بلادي
عندي فيها غير شبر
ونخلص كراهْ
عندي فيها غير صبر
حالي شكون دراهْ؟
٭٭٭٭٭
آغمامة فايضة
فين كنتي نايضة؟
وآش خصك
يا عبد السلطانة؟
ـ جبلْ
باش نلاهيو وطانا
ـ حبلْ
باش نشمش هاذ لبطانة
آغمامة فايضة
وفين كنتي نايضة؟
لحلاسة:
...............
................
.................
...................
آواه آواه
عمر الكلمة كانت شعير
عمرها كانت تعيش
آواه أواه
حكرة الرجال تطيّش
آواه أواه
آواه أواه
........................
آواه آواه
حميِّر لمحبة
الّلي كان جحِيِّش
آواه آواه
ولا يعرف يتخبى
يعرف ينيِّش
آواه آواه أواه
......................
.........................
....٭ رصاصات أرجأ إطلاقها إلى حين.